الزبلة ...مسؤولية شكون الدولة ولا المواطن

بينما هم جالسان كي العادة و العوايد في مقهى الحومة اتى عبد الستار و قريبه الزمڨري وانتحيا ناحية في طاولة منتظرين النادل  ثم ما لبثا أن شاركاهما الجلسة بمجرد أن أومأ لهما فتحي مناديا
- إيجا ياعبد الستار و اقعد هاي لاحمة كي العادة
-السلام عليكم
-و عليكم السلام اهلا بيك و بضيفك
-يعيشك اش نوة أحوالكم نقدملكم  ولد عمي جاء البارح من برلين

-مرحبا نتشرفوا
وبعد وابل من الترحاب.... تكلم عبد الستار
- مالي أركم صاخبين يا جماعة كي العادة مشات الكورة توة دورتوها سياسة  

فأجابه حمدي
- تي هانا  نتحدثوا حلى حملة اكبس أنا نقول أنو  الحكومة موش خايبة شرعية و تخدم على روحها  أم  لازمها تكبس و تنقص من التردد و الارتباك اللي هي فيه ....

 ضحك سامي فنظر فتحي شزرا  وأكمل :
- و سي سامي  يقول ارخفوا البندير توة وحدها تتكبس الحكومة انت آش تقول ؟

-أنا نقول انو الحكومة هاذي ترفس و المعارضة ترفس و الشعب قاد يخلص

- ضحك سامي بغيض  قائلا الشعب هازوا الواد و النهضة تقول العام صابة

فأجابه فتحي بحنق أقعد أنت نهار الكل تنبر على النهضة نقصوا من الحس قاعدين نحكموا يا صفر فاصل كي لفظتكم الناس و ما جبتوا شئ وليتو تسبوا في الشعب
تكلم الزمڨري  كأنه يريد التخفيف من الحدة فقال متسائلا :
بالله سامحوني أنا عندي نهارين تقريب توة ندور في العاصمة  باهت كيفاش حاملين ها الزبلة اللي في الشوارع ياخي مافماش بلدية تي راني ريت أنواع الزبلة الكل في الشارع مالدبابز للساشيات للحكك و الكواخذ و التراب كيفاش ساكتين على الزبله هاذي الكل
تنطر سامي قائلا:لا عاد نحن ماو في عهد الخلافة السادسة مانعترفوش بالنظافة
فقاطعه فتحي كل العادة

- برى عاد خرّف توة في هاذي آش مدخلها الحكومة أحنا مسخين مللي كان الزين يحكم فينا أحنا الشعب الوحيد اللي نكتبوا على الحيوط الله لا ترحم والديه اللي يحط الزبلة برى للمدارس و للستادات و المنازه و للبلفيدير و لوسط البلاد و شوف الناس ولا على بالها
قداش منها ها الدولة
-اما زادة البلديات موش قاعدة تخدم قال عبدالستار لا فمة كماين قاعدة تدور لا فمة بوبلات ياخي الناس وين باش تحط زبلتها لا فمة برامج منظمة متاع لمان زبلة يخليوها تتكدس بالعشرة أيام في  الثنية و مبعد يجيبولها دركتور يكب شطرها في الشارع ... الأعوان يكركوا  

قال سامي ياولدي حكومة مضيعة البوسطة كنت تشوف الزبلة هاذي في عهد بن علي كان يمشي البلاد كي المنقالة الأعوان تخدم جاو الخوانجية ضاعت هيبة الدولة هذا إذا بقات دولة أصلا
قاطعه فتحي توة انت شيوعي وليت زادة تتحسر على بن علي و أيماتو
-اي ياسيدي نتحسر خاطر مكناش نشوفوا في الوسخ هذا حتى ولات عنا كوليرا يعجبكش توة
- يا ولدي آنا كوليرا ياخي تكذبوا كذبة تصدقوها كان على الحكومة  هاي هبطت وزراء تنظف و ضحكتوا عليهم هاو عملوا حملات نظافة و شراو و عملوا و نظفوا آش تحب تعمل الحكومة كي الشعب موش واعي تي بالله كي تحط ورا كل مواطن عون تنظيف  متاع بلدية ما تتفضش ....شوية من الحنة و شوية من رطابة اليدين
-قال الزمڨري وقد استوى قائما ليقوم معه عبدالستار فعلا ياجماعة المسؤولية مشتركة بين الدولة اللي لازم أولى أولوياتها نظافة البلاد لأنو هذاكا راس المال و زادة وعي الناس بأنو كيما تحرص على نظافة بدنك و دارك لازم تحرص على نظافة محيطك سامحونا يا جماعة لازم ننمشوا موضوع طويل

-السلام عليكم

-وعليكم السلام

-سمعتوا آش قال ماو البلاد ولات زبلة هاذي مسؤولية النهضة هاذي ما تحكيلي حتى حكاية

-ارتاح يا سامي ارتاح و فكّّـ عليها النهضة شوية